Mga suspetsado sa pagpusil sa brodkaster mibalik

GIINGONG mibalik sa buhatan sa Bombo Radyo Cagayan de Oro ang mga suspetsado sa pagpusil sa brodkaster nga mao si Bombo James Dacoycoy o James Licuanan niadtong Huwebes sa dalan Ebarle-Capt. V Roa St., Barangay 30 ning siyudad sa Cagayan de Oro.

Si Celso Maldecir kinsa station manager sa sibyaan sa Bombo Radyo miingon nga ang mga suspetsado sa pagpamusil giingong mibalik sa ilang buhatan ug nangutana sa kondisyon ni Licuanan, gani gipangutana pa kung asa na nga balay tambalanan kini gidala ug luwas na ba kini.

"We believed those were the suspect because they were the same persons who went to the station on Thursday night, a few hours before Bombo James was shot," matud ni Maldecir.

Tungod niini nga hitabo, gikabalak-an sa management sa Bombo Radyo ang ilang seguridad labina gyod ngadto kang Licuanan.

"Since the Cagayan de Oro Police can't provide security for us, we plan to ask for help from the military. Maybe the military has more concern for our safety," dugang niini.

Ang Cagayan de Oro Police Office adunay gihatag nga usa ka polis nga mobantay kang Licuanan sa ospital gani wala kini relibo.

Si Major Eugene Osias kinsa tigpamaba sa 4th Infantry Division nipasalig nga ipaabot sa kadagkoan sa 4ID ang hangyo ni Maldecir. Gisuhestiyon usab niini nga ibalhin sa military hospital si Licuanan.

Samtang si Cagayan de Oro City Police Director Gerardo Rosales niingon nga ipasaka na nila ang kaso batok sa mga suspetsado. Daw natumbok na usab ang mga suspetsado ug padayon ang operasyon sa kapolisan aron pagsikop kanila.

Gipasalamatan nga luwas na sa makuyawng kahimtang si Licuanan ug makasulti na ning panahona. Hustisya lamang ang gisinggit sa pamilya niini ug higot nga seguridad niini.

Kahinumduman gipusil si Licuanan niadtong Huwebes dihang pauli na kini gikan sa iyang programang Zone Libre. Duha ka wala mailang mga suspetsado ang sakay sa kolor itom nga motorsiklo diin driver maoy nipusil sa biktima.

Wala maigo si Licuanan sa unang pagpusil hinungdan nakahigayon pa siya sa pagdagan apan gigukod ug gipusil hinungdan sa pagkaigo sa sampot niini nga milahos sa tiyan sa biktima. (ALR/MAY)