Mga politiko gihagit nga seryusohon ang kampanya batok illegal nga druga

GIHAGIT sa kanhi Undersecretary sa Dangerous Drugs Board (DDB) ang mga local government units (LGUs) nga pahugtan ug seryosohon ang kampanya batok sa gidiling druga sulod sa ilang tagsa-tagsa ka mga lokalidad.

Si Atty. Clarence Paul Oaminal nipadayag nga kon dunay mga opisyal nga mas dunay kasayoran sa kalihokan sa gidiling druga kini mao ang mga mayor labina nga sa kadako sa ilang mga intelligence funds nga magamit kay sa mga otoridad o mga agents sa Philippine Drug Enforcement Agency ug kapolisan.

“I don’t believe nga dili masayod ang mga politicians of any illegal activities within their jurisdiction kay naa silay mga tawo sa mga barangay,” matod ni Oaminal.

Siya nidugang nga kun ikumpara ang intelligence fund sa mga mayor ug pundo sa PDEA ug kapolisan gamay ra ang pundo sa mga otoridad ug kulang usab ang mga personahi nga maglihok.

Samtang gipasabot ni Oaminal nga dunay nagkadaiyang porma ang narco-politics diin pipila niini mao nga ang usa ka opisyal labina sa local nga mga opisyal sa barangay maoy nagpaluyo sa kalihokan sa gidiling druga, mahimo nga nagprotiher, kini mismo ang nagpayuhot o kaha nigamit niini hinungdan nga dili masumpo ang maong kalihokan sulod sa ilang area of jurisdiction.

Alayon niini giaghat ni Oaminal ang mga politiko nga mag-agresibo diha sa ilang kampanya ug pagpakig-away batok sa gidiling druga sama sa ilang ka-agresibo panahon sa ilang kampanya sa piliay.

“Kung magtinabangay lang ang tanan imposible nga modaghan pa ang demands sa illegal drugs,” dugang niini.