Grupo magtigom batok brownout

Tuesday, January 10, 2012

MAGPAHIGAYON ang grupo sa electric cooperative (EC) ug usa ka panagtigom dinhe sa Cagayan de Oro karong Enero 25, 2012, alang sa himoong lakang pagbatok sa kakulangon sa supply sa kuryente dinhi sa Mindanao.

Kini, human ang Association of Mindanao Rural Electric Cooperatives (Amreco) mi-admitar nga aduna gayuy kulang sa supply kuryente dinhi sa pulo sa Mindanao diin pila na ka adlaw karon nagsige na usab ug brownout.

Have something to report? Tell us in text, photos or videos.

Si Clint Django Pacana, ang executive director sa Amreco, mipasabot nga adunay himoong diskusyon bahin sa kon unsay maayong buhaton sa matag grupo hilabina niadtong mga electric cooperatives isip ilang kontribusyon ngadto sa paghatag ug istable nga power supply dinhi sa Mindanao pinaagi sa Mindanao Congress of the Advocates for Renewable Energy, Rural Electrification and Development (MinCARED) nga ipahigayon sulod sa tulo ka adlaw.

Gikabutyag usab nga diay dili na masaligan ang mga hydro plants nga kasamtangang ginagamit karon alang sa pagkuha ug supply sa kuryente nga i-apod apod ngadto sa nagkadaghan nga konsumante ug kinahanglan na gayud ang laing power resources nga ma-develop alang sa nasangpit nga katuyoan.

Gilauman nga adunay posibleng brownout nga mokabat hangtud ngadto sa 84 ka adlaw karong tuiga mao na lamang ang paningkamot sa Amreco nga unta dili kini mahitabo.

Nunot ning paningkamot, adunay mga dagkung lideres gikan sa nasyonal, congressional ug lokal nga pangagamhanan sa nagkalain-laing lugar sa Mindanao ang motambong sa maong panagtigum aron hiusahan ang pagpangita ug paagi nga dili mahitabo ang gikahadlokang pila ka bulan nga pagkawala sa supply sa kuryente.

Ang Mindanao University of Science and Technology (MUST) motambong usab aron paghatag sa ilang panghuna-huna kon unsay angay buhaton sa mga lideres sa nasud partikularmente sa Mindanao alang sa pag-develop ug laing power resources aron dili lamang magsalig ang tanan ngadto sa nagkakulang nga supply gikan sa mga hydro power plants.

Dugang pa ni Pacana, hisgotan usab atol sa panagtigum ang dagan sa operasyon sa mga ECs ug uban pang maayong lakang nga makatabang ngadto sa power sector hilabina ngadto sa mga generation companies.