Linog nasinati sa Cdeo

Tuesday, February 7, 2012

GIBATI og gamayng kahadlok ang mga residente sa siyudad sa Cagayan de Oro human nabati ang pagtay-og kagahapon mga alas 11:30 sa buntag.

Si Philippine Institute of Volcanology and Seismology (Phivolcs) Regional Director Marcial Labininay nibutyag nga dili lamang ang siyudad ang nakasinati niini apan ang Visayas diin nagikan ang epicenter sa magnitude-6.9 nga linog.

Have something to report? Tell us in text, photos or videos.

Nasinati ang intensity 3 sa siyudad sa Cagayan de Oro diin adunay 5.6 magnitude. Intensity 2 sa siyudad sa Butuan, Ozamis, Camiguin.

Gipahimangnoan ang katawhan nga dili magpaduol sa epicenter diin kini makita taliwala sa Negros ug Cebu.

Pipila ka mga taga Negros nagpahibalo pinaagi sa social networking site nga adunay mga dalan nga naguba samtang pipila ka mga building ang giingong nangliki. Hinuon padayon pa kining gikumpirma.

Ang mga trabahante usab sa nagkadaiyang buhatan o building didto sa Cebu nagsig-iya sa pagpanggawas.

Nipagawas usab ang Phivolcs kalabot sa tsunami alert labina niadtong duol gyod sa epicenter.

Ang katawhan angayan lamang nga magbantay ug mag-update matag karon ug unya sa mga panghitabo sa palibot human gialerto ang tsunami alert level.

Gibutyag ni Labininay nga dili gihapon nga magkumpiyansa ug angayan mangandam. (SVB)