Rafting sa Cdeo abli na

Tuesday, February 7, 2012

MAHIMO na mobalik sa normal ang mga kompanya sa rafting adventure dinhi sa Cagayan de Oro human gi-deklarar sa siyudad nga luwas na ang mga suba alang niadtong buot mogamit niini human sa nahitabong dakung pagbaha.

Matud pa ni bise mayor Caesar Ian Acenas, mas makalingaw pa ang mga kasubaan sa dakbayan karon human sa nahitabong pagbaha diin na-develop pa kini sa iyang kaugalingon tungod sa baha. Gani, gitawag pa kini nga “blessing in disguise.”

Have something to report? Tell us in text, photos or videos.

Ang rafting adventure isa sa pinaka-ginansiyado nga tourist attraction sa dakbayan alang sa mga kompanya sa travel and tour dinhi sa siyudad.

“Ang mga turista sigurado mag-enjoy pa ug samot karon tungod sa new look sa rivers,” ni Acenas.

Gidasig pa ni Acenas ang mga local ug foreigner nga mga turista nga testingan nila ang bag-ong hitsura karon sa mga kasubaan.

Tungod sa taas nga demand sa white river rafting dinhi sa dakbayan, kusog kaayo ang rafting business sa siyudad. Gani, nalakip kini sa mapa sa kalibotan isip isa sa mga patsada nga bisitahan alang niadtong mga rafters.

Nahitabo lang nga naghinay ang rafting business sa dakbayan tungod sa pagbaha human ang mga miyembro sa Oro Association of Rafting (OAR) nagboluntaryo nga motabang sa mga rescue operations sa dihang midangat ang pagbaha. (Loui S. Maliza)