Lalaki giluba; suspek tiklo

Wednesday, February 8, 2012

NAKAANGKON ug samad dinunggaban sa iyang likod ug lain-laing parte sa lawas ang usa ka lalaki human giluba sa nilabayng adlaw sa Osmeña-Hayes St, ning siyudad sa Cagayan de Oro.

Giila ang biktima nga mao si Randy B. Ponticha, 23, taga Bontong, Camaman-an ning siyudad. Gitumbok nga suspetsado mao si Romelito D. Galviso, taga 20th/21st Nazareth ning siyudad.

Have something to report? Tell us in text, photos or videos.

Nagronda niadtong tungora ang grupo sa mga barangay tanod nga mao sila si Noel Q. Gighe, Jorge M. Guerrero ug Aider Q. Colaste dihang ilang nakita ang pagpangluba ni Galviso ngadto ang Ponticha.

Gibutyag ni PO1 Joel Gacosta sa Police Station 2 (PS2) sa Cogon nga dihang ilang gisita ang suspetsado dali kining midagan hinungdan nga ilang gigukod.

Maayo nalang nasapon hinungdan nga gidala sa presintuhan.

Nakuha usab gikan sa posisyon niini ang guba nga gunting nga nagkadugo nga maoy gigamit sa pagpangluba.

Ang biktima nga si Ponticha daling gidala sa Northern Mindanao Medical Center (NMMC) kinsa ubos pa sa obserbasyon sa mga doktor ning panahona human nakaangkon og lawom nga mga samad.

Padayon pa nga gitino ang motibo sa pagpangluba.

Detinado karong panahona sa Maharlika Detention Cell ang suspetsado kinsa gikatakdang pasakaan og frustrated murder. (Raizzel Grece M. Gayomali, Lourdes College intern)