Mga bakwit gipahimangnoan sa saktong kalimpyo sa mga relocation site

Wednesday, February 8, 2012

ANG mga biktima sa bagyong Sendong ingon man mga survivor giawhag nga mag-obserbar sa sanitasyon sa pagkaligo, pagluto, ug pagpanghugas ingon man panglaba.

Sakto nga sanitasyon ug maintenance sa hygiene ug konkretong praktis sa solid waste management ang pipila sa mga health concern nga taas nga gi-promote sa mga doktor sa City Health Office (CHO) sa mga relocation site ug 39 ka mga evacuation center sa siyudad.

Have something to report? Tell us in text, photos or videos.

Ang kalimpyo sa mga kasilyas, shower room ug drainage maintenance ang matag karon ug unya ang gimonitor.

Aron masiguro ang konkretong praktis sa solid waste segregation, ang garbage bins o drums, trash bags o mga sako ang gipang-apod apod sa mga pamilya. Regular nga pagkolekta sa basura ang gimintinar.

“Kami sa City Health Office naningkamot kanunay sa pagserbisyo sa atong libuan ka mga affected families. Apan gikinahanglan usab ang hustong kooperasyon gikan sa atong mga kaigsoonan. Kini pinaagi sa ilang kanunay nga pagmatngon sa ilang obligasyon sa pagmintinar sa kalimpyo pinaagi sa pagpakita og disiplina" matud ni Dr. Teodulfo Joselito Retuya, City Government Department Head II.

Gidayeg usab ni Retuya ang mga ahensya nga dako og suporta labina ngadto sa Department of Health (DOH), UNICEF, Xavier University, Pilipinas Shell ug uban pang mga pribadong sektor nga miabag ug mitabang aron mapadayon ang kalimpyo sa mga apektadong pamilya. (PIA)