Wanted person tiklo

Thursday, February 9, 2012

NASIKOP sa hiniusang puwersa sa Regional Intelligence Division (RID) ug Regional Special Operations Group (RSOG) ang usa ka wanted person sa kasong pagpatay human sa 16 ka tuig nga pagtago-tago.

Ang suspetsado nga si Jefferson O. Dalumino, 35 anyos nga molupyo sa Lote Imbatug, Baungon, Bukidnon gisikop sa RID ug RSOG sa pagpangulo nila ni Police Superintendent Reynante R. Reyes ug Police Inspector Rustico R. Galagala Jr. sa maong dapit dili pa lang dugay.

Have something to report? Tell us in text, photos or videos.

Si Reyes nagkanayon nga ang pagkasikop ni Dalumino gihimo pinaagi sa usa ka warrant of arrest nga gi-isyu ni Regional Trial Court Judge Anthony Santos, presiding judge sa Branch 19 diin walay piyansa nga girekomendar.

Base sa record sa korte giingong gipusil sa suspetsado ang usa ka Verly Aldanese niadtong Nobiyember 26, 1996, mga alas 5:00 sa buntag sa Barangay Gusa ning siyudad sa Cagayan de Oro hinungdan sa kamatayon sa biktima.

Samtang sa laing kalampusan, usa ka Arnold S. Panal, 31, ug residenti sa Purok 7, Barangay Santiago, Iligan City ang nasikop usab sa RSOG tungod sa kasong pagpangawat.

Si Panal nasikop sa dalan Seriña, Barangay Carmen ning siyudad sa gilusad nga manhunt operation sa RSOG batok kaniya labina nga duna usab siyay warrant of arrest nga gi-isyu ni Judge Orlando Gallardo, presiding judge sa Municipal Trial Court of Cities (MTCC) Branch 2 sa dakbayan sa Iligan.

Hinuon, dunay piyansa nga girekomendar ang husgado alang sa temporaryong kagawasan sa suspetsado nga P30,000.