2 na-sideswipe sa kotse

Monday, February 13, 2012

DUHA ka mga biktima ang pulos nilanding sa Northern Mindanao Medical Center (NMMC) human na-sideswipe sa sakyanan niadtong Domingo sa managlahing lugar.

Unang biktima ang 6 anyos nga mao si Febo Bless Luji, taga Westfield, Iponan ning siyudad.

Have something to report? Tell us in text, photos or videos.

Mitabok sa kalsada ang biktima mga alas 3:05 sa kadlawon niadtong Domingo ug ang likod ra niini ang gibantayan kung wala bay sakyanan apan deretso kining nabanggaan dihang wala namatikdan ang atubangan nga bahin.

Usa ka Toyota Vios ang nakabangga niini nga gimaneho ni Dindo Galarpe, 31, taga Upper Carmen ning siyudad.

Hinuon wala gipasagdan sa driver ang bata ug gidala mismo niini sa balay tambalanan human nakaangkon og bun-og ug pangos sa lawas.

Samtang ang ikaduhang biktima mao si Dexter de Guzman, 26, ulitawo, taga Zone-8, Cugman ning siyudad.

Nasayran nga gikan nag-inom ang biktima niadtong Sabado sa gabii ug pauli na unta sa puloy-anan niadtong tungora dihang kalit lang kining nabanggaan og taxi nga miresulta sa pagkalagpot niini.

Nakaangkon og bun-og sa lain-laing parte sa lawas si de Guzman.

Giingong mibiya ang taxi human sa insidente hinungdan nga ang nagpakabanang katawhan nga nakakita niini maoy nidala sa NMMC.

Ubos pa sa obserbasyon sa mga doktor ang biktima ning panahona.SVB