CdeO mitunol og P10.644M nga hinabang

Monday, February 13, 2012

MOBALOR sa P10,644,000 ang gitunol sa lokal nga kagamhanan isip hinabang pinansyal alang sa 1,787 ka mga pamilya nga nawad-an o nagub-an og balay tungod sa bagyong Sendong.

Gisaksihan ni Mayor Vicente Y. Emano, Bise Mayor Caesar Ian Acenas, mga miyembro sa konseho ug mga sakop sa City Crisis Committee ang ikaduhang hugna sa pag-apud-apud sa ayuda nga gipahigayon Pebrero 10, 2012 diha sa City Tourism Hall.

Have something to report? Tell us in text, photos or videos.

Dili angayan nga mag-ilog sa maong gamay nga tabang gikan sa dakbayan. Ang tanan matagaan gayud subay sa natala sa payroll bisan pa man nga magabin-an ang mga kawani sa City Hall sa pag-apud-apud sa maong kantidad, gipaniguro ni Emano.

Kining mga tabang pinansyal dili igo alang sa tanang panginahanglanon sa mga biktima sa Bagyong Sendong, apan kami naglaum nga unta bisan sa kagamay niining kantidad, makatabang unta kini sa pagbangon sa mga katawhang biktima sa trahedya, pasabot sa mayor.

Sa maong gidaghanon, 1,643 ka mga pamilya ang taga-Balulang, 81 gikan sa Barangay Agusan, 60 gikan sa Baikingon ug tulo gikan sa Balubal.

Subay sa talaan sa City Social Welfare Department (CSWD), adunay 510 ka mga panimalay ang totally damaged ug 1,277 ang partially damaged.

Gipasabot ni City Accountant Wilma Polley Rugay, miyembro sa City Crisis Committee, nga ang nadawat sa mga benepisaryo nagdepende sa kantidad sa damyos sa ilang mga panimalay. Mokantidad gikan sa P2 mil pesos hangtud P9 mil pesos ang gitunol alang sa totally damaged nga balay. Samtang, P1,500 hangtud P8 mil ang nadawat alang sa partially damaged nga balay.

Kahinumduman nga sa unang hugna, 323 ka mga pamilya nga nakabsan sa ilang mga minahal sa kinabuhi ang natunolan sa syudad og tag-P15 mil nga hinabang matag patay’ng lawas niadtong Pebrero 2, 2012. Dul-an sa P5 milyones ang kinatibuk-ang nahatag niadtong higayona diin ang pundo nagikan gihapon sa 5% Calamity Fund sa dakbayan sa Cagayan de Oro. (PR)