E-blotter mawala-wala ang server?

Monday, February 13, 2012

HUMAN sa malampusong paglusad sa E-blotter niadtong nilabayng semana sa tulo ka mga napiling pilot area sa Cagayan de Oro City nga mao ang Police Station 1 (PS1) sa Divisoria, PS3 sa Agora ug PS5 sa Macabalan, nasutang aduna gihapoy kalangan nga mahatod ang mga incident report tungod sa pagkawala-wala sa server niini.

Usa ka polis nga nahinabi sa Sun.Star SuperBalita apan gustong magpatago sa iyang pangalan niingon nga tungod sa kahinay sa server dili na kini madawat didto sa kaulohan.

Have something to report? Tell us in text, photos or videos.

Kanunay anaa sa computer nakatala ang inadlaw nga report apan kalangan nga mahatod tungod sa kahinay ug kawala nga server.

Apan kini hugot nga gihimakak sa Police Station 1 sa Divisoria, usa sa pilot areas sa E-blotter.

Ang mga polis nga nainterbyu usab ning mantalaan niingon nga dili tinuod nga dili moabot sa kaulohan ang mga report tungod kay hinay ang server.

Gibutyag sa mga polis nga normal lamang kini sa computer ug koneskyon nga magputol putol.

“Pareha ra gud kung mag google ka kay duna kay e search pero kay walay koneksyon dili nimo makuha ang imong gusto nga ma search,” pasabot sa team leader sa night shift sa PS1 niadtong Domingo.

Hinuon ilang gipasabot nga masukod ang ka epektibo niini kung moabot na sa pila ka bulan ug dili lamang sa bag-o pa gilusad.

Kahinumduman inisyatiba ni PNP Chief ang E-blotter nga kung adunay mga insidente sa usa ka area ug i-record kini sa E-blotter system moderetso kini sa PNP regional offices ug Camp Crame.

Kini mas nailang bag-ong Crime Incident Report System diin mismong si PNP Chief of Police Director General Nicanor A. Bartolome ang nangulo sa inagurasyon sa ‘E-blotter’ sa tulo ka mga Police Station denhi sa siyudad niadtong Huwebes nilabayng semana.

Ang E-blotter system usa ka prayoridad nga programa ni Bartolome diin kini aron mapalambo ang crime reporting system sa nasod ug mahimong epektibo ang law enforcement, public safety ingon man maayo nga administrasyon sa paghatag og hustisya.

Ang unang gilantaw sa E-blotter system mao ang adunay inadlaw nga update partikular sa mga presintuhan sa polis aron sayon nga matubag ug mapugngan ang krimen nga matigayon.

Ang E-blotter gi-install sa tanang police station nga magsilbi usab nga report ug monitoring sa tanang krimen nga nahitabo sa matag area of responsiblity ingon man resulta o record sa imbestigasyon.