Inahan miambak sa tulay

Monday, February 13, 2012

TUNGOD sa sobrang depresyon nga nawad-an og anak niadtong paghapak sa bagyong Sendong sa nilabayng tuig, usa ka inahan ang gustong hunoson ang iyang kaugalingon pinaagi sa pag-ambak sa tulay niadtong Biyernes mga alas 11:20 sa gabii sa Rotunda Bridge ning siyudad sa Cagayan de Oro.

Giila ang biktima nga mao si Tajata Casera, 25, bulag sa asawa, temporaryo nga nagpuyo sa tent 337 sa relocation site sa Calaanan ning siyudad.

Have something to report? Tell us in text, photos or videos.

Si Casera kanhi residente sa Cala-Cala, Macasandig ug adunay duha ka mga anak nga nag-edad og 1 ug 3 anyos.

Dihang nihapak ang bagyong Sendong, gilampornas ang ilang puloy-anan ug ang 3 anyos lamang nga bata ang nasalbar ninii samtang ang 1 anyos nga anak ang giingong naapil sa pagkaanod sa baha ug sa kasamtangan nagpabilin nga missing.

Giingong sige og huna-huna sa nawala nga anak ang 25 anyos nga inahan.

Gibutyag sa mga silingan niini nga dili gyod malimtan ang anak ug magsige lang kini og pangita.

Sa wala pa nahitabo ang pag-ambak sa tulay niadtong Biyernes sa gabii, nakig-inom ang biktima sa kauban niini sa silingan nga tent.

Tungod kay apektado man og ilimnong makahubog migawas kini sa tent city ug misakay og motorela paingon sa rotunda ug didto deretsong miambak sa tulay, maayo na lamang mideretso kini sa tubig.

Adunay nakakita niini nga mga residente sa dapit hinungdan nga daling gitabang ug gidala sa Northern Mindanao Medical Center (NMMC).

Ang security guard sa emergency room nga nahinabi sa Sun.Star SuperBalita niingon nga paghidangat pa niini sa balay tambalanan ug dihang gipasakay na sa stretcher bed gipakog pakog pa niini ang iyang ulo sa kilid niini kay gusto gyod niining hunoson ang kaugalingon.

Hinuon gawas sa pangos ug bun-og nga naangkon wala nay lain pang nabati ang biktima ug out patient karon sa NMMC.

Tungod niini, giawhag gihapon ang adunay kaayo sa pag-debrief nga himuon kini sa mga biktima bisan tuod naplastar na sila niining panahona sa tent tungod kay wala kini nagpasabot nga ang ilang emosyonal nga pagbati naulian na.