Lalaki giluba sa bayaw

Monday, February 13, 2012

DUHA ka mga samad ang naangkon sa usa ka lalaki human giluba mismo sa bayaw niini niadtong Domingo mga alas 9:00 sa gabii sa Bayabas ning siyudad sa Cagayan de Oro.

Giila ang biktima nga mao si Salcedo Sumanpan Jr., 20, ulitawo, taga Zone-2, Bayabas ning siyudad.

Have something to report? Tell us in text, photos or videos.

Gitumbok nga suspetsado ang iyang bayaw nga mao si Romel Patolilik, hingkod ang edad, minyo, sa susamang dapit apan lumad nga taga Kibawe, Bukidnon.

Gisaysay ni Salcedo sa kapolisan sa Police station 4 (PS4) sa Carmen nga kalit lang nasuko kaniya ang iyang bayaw ug kalit nangluba gamit ang tahiay og sapatos.

Tungod niini nakaangkon og duha ka samad ang biktima kinsa gitambagan sa kapolisan nga magpatambal sa ospital.

Ang kaso gisunod na sa kapolisan sa PS4 aron pagsikop sa suspek human giingong misibat. Giingong apektado usab og ilimnong makahubog ang biktima atol sa insidente.