Presyo sa bulak modoble sa Valentine's Day

Monday, February 13, 2012

ANG paghatag og bulak ang usa sa labing kumon nga regalo matag kasaulogan sa Valentine's Day tungod kay kini ang giisip nga labing romantiko nga paagi nga mapadayag ang gugma ngadto sa usa ka tawo sama sa hinigugma ingon man gininakan ug mga higala.

Apan sa nagkaduol nga kasaulogan niini, nasutang midoble ang mga presyo sa mga bulak.

Have something to report? Tell us in text, photos or videos.

Si Rubylyn Pagaran, 28, taga Camaman-an ning siyudad, trabahante sa Daisy Duran flower shop nga nahinabi sa Sun.Star SuperBalita niingon nga mas modoble pa ang presyo sa mga bulak samtang nagkaduol ang Valentine's Day.

Sa pagkakaron, wala pa kaayo mamalitay og bulak, mga sunod semana pa nia mukusog, mga Lunes ug Martes. Mag taas sad gyod ang mga presyo niini kay kung magmahal ang hatag sa among dealer, magsaka sad among presyo kay alkansi man sab mi, butyag ni Pagaran.

Ang rose sa tanan color mokabat sa P10 ngadto sa P20 matag usa; Malaysian Mumps, P25 ngadto P30 matag usa; ang basket of flowers P50 matag basket ngadto sa P100 per basket; ang 1 dosena nga ready made bouquet mokantidad og P500 ngadto P700; orchids P100 ngadto sa P200 samtang mosaka ngadto sa P500 ang Calla Lily.

Hinuon ang mga mamaligyaay niingon nga dili lamang sa bulak ipaagi ang dakong gugma apan ipakita kini sa buhat.

Ang bulan sa Pebrero mao ang bulan sa pagpadayag sa gugma ngadto sa kapikas, pamilya, mga amigo/higala, sa atong mga isig katao, ug sa atong hinigugmang Diyos. (Christine Marie Doliente, Lourdes College intern)