Mga flowershop gidugok

Tuesday, February 14, 2012

DAGHAN sa mga katawhan ang nagpunsisok sa mga flowershop bisan sa pagdoble sa presyo niini kagahapon atol sa kasaulogan sa Valentine’s Day.

Ang mga flowershop nga nahimutang sa Cathedral nga bahin ning siyudad sa Cagayan de Oro ang gidagsa labi na sa mga kalalakihan aron mamalit og mga bulak nga ihatag sa ilang mga minahal sa kinabuhi.

Have something to report? Tell us in text, photos or videos.

Si Fred Termoso nga nainterbyu sa Sun.Star SuperBalita niingon nga mga kadlawon pa aduna nay nipalit kanila og bulak.

“Siguro sa dili pa makamata ilang asawa anaa na ang bulak ug maoy ilang isorpresa,” matud niini.

Misaka usab ang ilang kita kon itandi sa mga ordinaryong mga adlaw sa pagpamaligya.

Gibutyag usab niini nga talagsa lang kayo ang babaye ang mopalit og bulak ug kasagaran gyod mga lalaki gani ang uban ipa-deliver pa mismo sa mga lugar kung diin nahimutang ang ilang mga asawa, inahan o mga hinigugma.

Nasutang kung anaa lamang sulod sa siyudad moabot sa P80 ngadto P100 ang delivery fee sa bulak gawas lamang kung didto na sa Tablon o gawas sa siyudad nga moabot na sa P500 ngadto P1,000 depende sa kalay-on.

Gani moabot sa usa ka libo ang mga pumpon sa bulak apan aduna gyod gihapon daghan nga namalit niini.

Ang mga give-aways usa sab sa halinon kagahapon sa kasaulogan labina kadtong igo lamang ang kwarta apan gustong mapahalipayan ang ilang mga minahal sa kinabuhi.

Si Israel San Juan kinsa mipalit og bulak alang sa iyang girlfriend nibutyag atol sa pakighinabi niini nga naandan na niya matag tuig nga hatagan ang iyang uyab og bulak.

Bisan tuod wala pa sila makasal apan lig-on gihapon ang ilang panag-ipon tungod sa dakong pagsalig sa usag-usa.

Sa laing bahin ang mga hotel, motel ug lodging house mao ra gihapon ang rate ug walay pagtaas niini. Rason sa mga nagdumala nga dili nila sakyan ang panahon ang adlaw sa paghinigugmaay.

Adunay usab santos nga misa sa mga simbahan sa siyudad pahinungod sa pagkamartir ni Saint Valentine.