Biktima sa Sendong naghikog

Wednesday, February 22, 2012

BUGNAW na ug nanggawas ang dugo sa ilong sa usa ka 42 anyos nga lalaki dihang nakaplagan sulod sa Tent City relocation site, Calaanan ning siyudad sa Cagayan de Oro.

Nadiskubre kagahapon mga alas 7:00 sa buntag ang nigahi na nga mao si Jesus Noel Buenvinida, bulag sa asawa, kanhi residente sa Zone-7, Acasia St., Carmen ning siyudad ug kasamtangan nagpuyo na sa Tent City human ang Bagyong Sendong.

Have something to report? Tell us in text, photos or videos.

Masusing imbestigasyon ang gihimo sa Scene of Crimes Operatives (SOCO) kung aduna bay foul play sa kamatayon niini human nasutang naay dugo ang ilong niini diin unta dili mahitabo sa usa ka tawo nga naghikog. Hinuon adunay pisi ug nagmarka ang hiniktan niini sa liog.

Apan basi sa pamahayag sa silingan sa tent ingon man sa igsuon niini nga posibling naghikog gyud ang biktima.

Nasayran gikan sa igsuon sa biktima nga sa wala pa nahitabo ang insidente, iya pa kining nahinabi sulod sa tent apan naa ang pagtipas sa estorya.

Pipila sa mga gipamulong niini adunay kalambigitan sa bag-ohay lang nga paghapak sa Bagyong Sendong.

“Panlakaw namo kay dako na ang tubig,” tipik sa pahayag sa biktima ngadto sa iyang igsuon sa wala pa nahitabo ang giingong paghikog.

Ang kapolisan nagtuo nga dakong depresyon ang gibati niini human apil ang puloy-anan niini nga naanod ug ang motorsiklo lang niini ang nadala uban sa iyang usa ka anak.

Ang Acasia, Carmen ang usa sa labing apektadong lugar atol sa pagbaha ug ubay-ubay sa puloy-anan ang naanod ug residente ang namatay.

Ang kapolisan nitambag sa kabanay nga i-otopsiya ang patayng lawas aron masuta kon wala bay foul play sa kamatayon.

Sa pagsulat ning balita, gidala na ang patayng lawas sa Bollozos funeral parlor. (Stephanie V. Berganio)