2 gipusil na-ospital

NILANDING sa Northern Mindanao Medical Center (NMMC) ang duha ka mga lalaki kinsa gipusil sa managlahing dapit.

Unang biktima giilang si Ramil Abao, 37, minyo, taga Zone-8, Bulua ning siyudad sa Cagayan de Oro.

Niadtong Domingo mga alas 5:30 sa hapon daw nagpalit og ilimnong makahubog si Abao sa usa ka tindahan sa dapit nga gipanag-iyahan sa usa ka retired army nga giilang si Leony Ontero.

Apan gikuha dayon sa asawa sa sundalo ang basyo sa botelya labina kay sayo man kini mangopra pagkabuntag.

Daw nagkabikil sa storya ang duha nga nadungog sa ni Ontero.

Dihang misangpot sa panaglalis daw kalit lang mikuha sa iyang armas si Ontero ug gipusil ang biktima nga miresula sa pagkaigo ug pagkabangag sa paa sa biktima.

Nilanding sa NMMC ang biktima kinsa desididong mopasaka og kaso apan nasayran nga wala na sa dapit si Ontero ug asawa niini ning panahona.

Ang kaso giimbestigahan pa sa Police Station 7 (PS7) sa Bulua.

Laing biktima sa pagpamusil mao si Alex Morales, 43, lumad nga taga Purok 6, Pontian, lungsod sa Quezon, Bukidnon.

Gibutyag sa amahan niini nga maoy nidala sa biktima sa NMMC nga iya na lamang ngga nakita ang biktima nga nagbuy-od sa dalan nga wala nay panimout ug nagkadugo na ang ulo niini.

Nasuta sa mga doctor nga samad pinusilan sa ulo ang naangkon niini dihang gipusil samtang nagbaklay paingon sa puloy-anan.

Gisuta pa sa kapolisan sa dapit kung unsay motibo sa pagpamusil ug unsa ang kalambigitan sa biktima nganong gipusil kini. (SVB)