Simbahan dili uyon sa casino

HUMAN si Cagayan de Oro City Mayor Vicente Emano namahayag sa iyang dakong pag-uyon nga mosulod sa siyudad ang casino sukwahi usab ang tubag sa Archdiocese sa siyudad.

Dili uyon ang simbahan niini sa posibleng pagsulod sa casino labina daghan na sa mga negosysnte ang mipadayag sa ilang kaigkag nga mosulod sa siyudad ug mobubo sa ilang puhunan alang lamang niini.

Si Archbishop Antonio Ledesma SJ, DD., niingon nga ang simbahan dili uyon niini tungod sa moral issues.

“Dili maayo alang sa pamilya ug komunidad sa siyudad,” matud ni Ledesma sa interbyu sa Sun.Star Cagayan de Oro.

Gibutyag niini nga ang isyu sa casino nagsugod pa niadtong panahon pa Archbishop Jesus B. Tuquib, D.D.

Sa tubag nga si Emano nihatag sa prebilihyo sa archdiocese nga modesisyon kalabot sa desisyon nga mosulod sa siyudad ila usab gi-welcome sa iyang pronouncement si Emano.

“Dili lamang kita ang midiktar niini apan kini repleksyon usab sa sentiyemento sa kadaghanan. Bisan pa sa una dili lamang ang simbahan ang dili iyon niini apan nagkalain laing sector,” dugang ni Ledesma.

Gilantaw usab niini ang mga implikasyon nga posibleng mahitabo sa laing area kung ang casino mainstalar sa siyudad.

Posibleng kini magdala sa mga big time gamblers, dili maayo sa turismo, dili maayo sa pamilya labina sa mga kabataan. Kinahanglan usab kining lantawon.

Niadtong Huwebes sa programa ni Emano sa usa ka sibyaan sa radio gibutyag niini nga gawas sa Malaysian, Israel ug China nga gusting mobubo og puhunan alang sa casino aduna na usab Korean nga gustong mo-apil niini.

“Giingnan ko nalang sila nga didto kamo sa simbahan pananghid kay kung ako lang uyon ako og dako nga adunay casino sa siyudad,” butyag ni Emano.

Gipadayag ni Emano nga dako ang iyang pagrespeto sa kasimbahanan ingon man mga tawo nga supak niini ug kung dili mouyon niini wala gyod casino nga matukod sa siyudad.

Kahinumduman unang gibutyag ni Emano nga magdala og maayong turismo sa siyudad ang casino, taas ang entrance fee ug adunay mapadulngan ang mga turista kung mobisita. (SVB/MAY)