3 dump truck gisunog sa NPA

GITUOHANG pagpangilkil ang motibo sa pagpangsunog sa tulo ka dumptruck niadtong nilabayng adlaw sa Barangay Mandangwa, lungsod sa Balingsag, Misamis Oriental.

Ang tulo ka dumptruck gipanag-iyahan sa magtiayong Engr. Roberto Abogado ug Vice Mayor Marietta R. Abogado.

Gituohan sa kapolisan sa Balingasag Police Station nga sakop sa Front Committee 4B sa New Peoples Army ang nihimo sa pagpangsunog dihang giingong giparking gawas sa puloy-anan sa magtiayon ang tulo ka mga mini dumptruck.

Si Senior Superintedent Graciano Mejares kinsa Misamis Oriental Provincial Police Director nibutyag sa usa ka interbyu sa sibyaan sa radio nga ilang gilusad ang operasyon aron pagsikop sa nihimo niini.

Nahibaw-an nga niadtong nilabayng semana pa giingong nakadawat og extortion letter ang magtiayon apan wala gikabutyag kung nahatagan ba kini.

Sa iyang bahin usab ni Major Eugene Osias kinsa tigpamaba sa 4th Infantry Division niingon nga posibleng pagpangilkil ang motibo sa mga suspek. (SVB)