Kidnap for ransom suspek tiklo

NASIKOP sa mga operatiba sa Regional Special Operation Group (RSOG) 10 gipangulohan mismo ni Police Inspector Patrick Jess P. Paguirigan ang suspetsado sa pagpangdagit human gihimo ang malampuson nga entrapment operation.

Kini miresulta sa pagka-aresto sa suspetsado nga mao si Archie E. Rabaya, 31, minyo, kasamtangan nga empleyado sa Rural Transit Mindanao Incorporated (RTMI) ug lumad nga taga Purok 5A, Linamon, Lanao del Norte, uban usab sa lima ka mga kauban niini.

Si Rabaya usa sa suspek sa pagpangidnap sa 20 anyos nga mao Darry May C. Perocho, minyo ug residente sa Purok 2, Paypayan, siyudad sa Oroquieta, Misamis Occidental, kinsa na-rescue human sa operasyon sa mga operatiba sa RSOG-10.

Matud ni Police Inspector Paguirigan nga ang entrapment operation gihimo human ang GMA 7 Isyu Karon correspondents mi-abag sa usa ka complainant nga mao si Raegan B. Perocho human gikidnap ang asawa niini sa usa ka organisadong sindkiatong grupo nga nagdemanda niadtong tungora og P10,000 alang sa kagawasan sa asawa.

Nagmalampuson ang operasyon niadtong Domingo mga alas 01:15 sa kaadlawon sa West Bound Terminal, Bulua ning siyudad sa Cagayan de Oro City diin gihimo ang paghatag sa ranson money.

Bisan tuod misukol ang suspek apan nasikop gihapon kini, ang mga kauban nakasibat human sa insidente.

Gipasalamatan nga ang biktima nga si Darry May ang luwas nga na-rescue.

Atol sa pagkaaresto, nakuha gikan sa posisyon sa suspek ang marked money nga mobalor og P10,000, usa ka bladed weapon ug drug paraphernalia.

Sa lawom nga imbestigasyon nga gihimo sa kapolisan ug sa paghinabi nila sa biktima, gisaysay sa biktima nga nga unang gi-hire siya sa grupo nga mag-deliver og mga tambal alang sa ilang kostumer.

Nasuta dayon sa biktima nga ang iyang gi-deliver pulos mga ginadiling druga nga gituohang Shabu hinungdan nga miundang sa iyang trabaho ang biktima apan wala misugot ang grupo ug gidala dayon kini sa lungsod sa Jasaan, Misamis Oriental. Sunod-sunod na dayon nga pagpanghulga ang iyang nadawat ug gitawagan ang iyang bana nga kinahanglan siya nga lukaton sa kantidad nga P10 mil.

Ang suspetsado detinado karon sa kasong Kidnapping/Serious Illegal Detention, Concealing of Deadly Weapon ug Violation of Sec. 12, Art II of RA 9165 kon Comprehensive Dangerous Drugs Act of 2002. (Stephanie V. Berganio)