Motor vs awto, 1 kritikal

KRTIKAL ang kahimtang sa usa ka driver sa motorsiklo human mibangga sa usa ka sakyanan niadtong Lunes mga alas 10:30 sa gabii Upper Carmen ning siyudad sa Cagayan de Oro.

Giila ang biktima nga mao si Daleon Salvador Jr., 31, minyo, taga-San Isidro, lungsod sa Talakag, Bukidnon.

Ang nasungag nga awto nagdala og plaka KCX-480 gimaneho usab ni Dandonald Galvez.

Si Galvez nga maoy nitabang sa biktima human sa insidente niingon nga paingon siya sa ibabaw nga bahin niadtong tungora samtang ang biktima paingon sa paubos.

Dihang iyang nakita nga mibarag kini sa gidrayban nga motorsiklo iyang gilikay ang iyang sakyanan apan nipaingon gihapon kini ngadto sa iyang sakyanan hinungdan gyod sa pagsungag.

Dili mahitsura ang biktima tungod sa grabeng naangkon niini sa lawas.

Daghan sa mga bukog niini ang nabali ug maayong pagkabunal sa ulo sa biktima human usab wala kini nagsul-ob og helmet niadtong gabhiona.

Dihang gitabang kini aron dalhon sa tambalanan nasimhotan nga apektado kini og ilimnong makahubog.

Gidala dayon ang biktima sa Northern Mindanao Medical Center kinsa ubos pa sa obserbasyon sa mga doctor sulod sa emergency room ning panahona.

Ang Roads and Traffic Administration (RTA) daan na nipahimangno nga unta kining mga driver sa motorsiklo dili mag-inom kung nagmaneho tungod kay ning bulan lamang sa Abril misaka ang kaso sa bangga denhi sa siyudad. (SVB)