Dyip gisungag, 1 patay

NAKABSAN sa kinabuhi ang usa ka lalaki human nabangga ang motorsiklo nga giamneho niini niadtong Miyerkules mga alas 7:50 sa gabii sa Barangay Casinglot, lungsod sa Tagoloan, Misamis Oriental.

Giila ang biktima nga mao si Rutsib Casiño, hingkod ang edad, minyo, residente sa susamang dapit.

Si Police Officer 1 Mylene Sabio sa Tagoloan Police Station, nga nahinabi sa Sun.Star SuperBalita, niingon nga ang gimaneho nga motorsiklo ni Casiño maoy nibangga sa usa ka public utility jeepney (PUJ) nga Villanueva Liner nga gimaneho ni Jaime Hermoso.

Matud ni Sabio nga nihunong ang dyip niadtong tungora kay adunay manaog nga pasahero apan posibleng kusog kaayo ang dagan ni Casiño hinungdan nga wala na kini maka-brake ug maoy mibangga sa likod nga bahin sa dyip.

Gituohang nabunal ang ulo niini sa likod sa dyip ug nakaangkon kini og ubay-ubay nga bun-og sa lawas hinungdan nga gidala pa sa Puerto Sabal Community Hospital, apan pipila ka minuto ang nilabay wala nakaagwanta sa biktima ang mga naangkon nakabsan gyod kini sa iyang kinabuhi.

Ang kaso giatiman na karon sa Tagoloan Police Station samtang driver sa dyip anaa sa kasamtangan sa buhatan. Gipamugos usab sa driver sa dyip nga dili siya mabasol sa insidente.