Junk shop gitulis, P80 mil nadala

GITUOHANG organisado nga grupo ang mitulis sa usa ka junk shop kagahapon mga alas 7:30 sa buntag sa 8th-8th Nazareth St. ning siyudad sa Cagayan de Oro.

Ang Devibar Junkshop gipanag-iyahan ni Ramil Devibar, hingkod ang edad, sa susamang dapit kinsa nabiktima sa mga tulisan.

Saysay ni Devibar nga mokabat sa P80 mil ang nakuha sa unom ka mga tulisan nga pulos armado og .45 kalibre. Wala pay labot sa kwenta ang pipila nga gipangkuhaan og pitaka.

Saysay sa biktima nga taod-taod na sila nag-abli sa ilang junk shop niadtong buntaga ug anaa siya sa sulod niini.

Nakurat siya pag-ayo sa kalit nga presensya sa unom ka mga suspetsado nga deretso og tion kaniya og pistola dungan sa pagdeklara og tulis.

Wala na milihok ang biktima ug nagpabiling kalmado lamang apan wala gipakita ang kahadlok dihang anaa kaniya nakatutok ang mga pistola sa mga suspek.

“Mao to, niingon na lang ko nga kuhaa lang ninyo tanan kwarta, ayaw lang apila akong pitaka kay daghan man importante diha sulod,” matud niini ug miyango usab dayon ang mga suspek ug nimando nga ihatag tanan kwarta.

Ang kwarta sulod sa bulsa sa biktima mobalor og P50 mil, samtang gipangayo og lakip sa mga suspek ang anaa sa kaha nga mobalor og P30 mil.

Matud ni Devibar nga ang uban sa kantidad bayaray unta niadtong adlawa. Sigon usab sa mga nanulod, kostumer man o trabahante ang gipangkuhaan og pitaka ug gipanglabay ra usab pagbalik kay kwarta man lang ang gikuha.

Matud ni Devibar nga organisado kaayo ang grupo kay gani kalma lamang kaayo nga nanglakaw paingon sa naghulat nga duha ka mga motorsiklo.

Apan nahimong blanko ang iyang huna-huna ug wala na nahibaw-an kung adunay plaka o wala ang motorsiklo ingon man mga hitsura mga suspetsado tungod sa nahitabo.

Ang kapolisan sa Police Station 9 sa Macasandig nihimo pa og dugang imbestigasyon aron paggukod sa mga suspek.

Kahinumduman, nigawas sa intelligence report nga adunay grupo sa mga tulisan nga giingong moatake sa siyudad ug giingong angayan nga magbantay ang mga establismento ug mga bangko.