Principal sa Misamis Oriental gidagit

CAGAYAN DE ORO -- Padayon nga gipangita ang principal nga gidagit sa upat ka wala mailing suspetsado niadtong Lunes mga alas 4:00 sa hapon sa Barangay Hinigdaan, lungsod sa El Salvador, Misamis Oriental.

Giila ang biktima nga mao si Erwin Respito, hingkod ang edad, officer-in charge sa Hinigdaan High School.

Gidagit ang biktima dihang pauli na kini sakay sa iyang motorsiklo sa boundary nga bahin sa Hinigdaan ug Barangay Kalabay-labay.

Kalit lang nga gitabangan ang biktima sa upat ka mga suspetsado ug gipasakay sa lain nga motorsiklo.

Tungod sa kakusog sa dagan sa motorsiklo ug posibleng misukol ang biktima, nabangga kini apan gibalhin gihapon ang biktima sa pagpasakay sa usa ka van.

Nakasibat ang motorsiklo nga nabangga apan nabilin ang OR niini ug ang rehistro nga nasutang gipanag-iyahan sa usa ka Barangay Kapitan sa usa ka lungsod sa Bukidnon. Hinuon, padayon pa kining gi verify sa Land Transportation Office.

Ang kapolisan sa El Salvador Police Station blanko pa sa motibo sa pagpangdagit ug gisuta pa ang mga kalambigitan niini.

Bisan ang mga paryente sa biktima wala pa masayod unsa ang motibo niini.

Ang kaso padayon pa nga gisunod sa kapolisan hangtod sa pagsulat ning balita.

Dili usab tinoud ang taho nga nangayo na og ransom ang mga suspek.