Lolo nadugta

NAKAPLAGANG anaa na sa pagkadugta ang patayng lawas sa usa ka lolo sulod sa puloy-anan niini niadtong Martes mga alas 5:00 sa hapon sa Zone-7, Poblacion, lungsod sa Opol, Misamis Oriental.

Giila ang biktima nga mao si Martin D. Bernaldez, 83, residente sa susamang dapit.

Si Police Officer 2 Jonathan Eduave sa Opol Police Station nga nahinabi sa Sun.Star Superbalita niingon nga gikatakdang i-otopsiya ang patayng lawas niini aron masuta kung wala bay foul play sa kamatayon sa biktima.

Gibana-bana anaa na sa tulo ngadto sa upat ka adlaw gikan namatay ang biktima ug tungod kay dili na maagwanta ang baho nga dala sa hangin hinungdan nga gisusi kini sa mga silingan.

Namatikdan usab nga wala na migawas sa puloy-anan ang biktima ug uwahi kining nakita niadtong nilabayng mga adlaw nga naglakaw lakaw.

Pagsusi sa puloy-anan niini patay na ang biktima ug anaa na sa pagkadugta. Gisusi usab ang palibot niini apan ang kapolisan walay nakita nga adunay nahitabong komusyon.

Gawas lamang sa yabi nga nakakandado sa ubos nga bahin pero giklaro nga posibleng ang biktima lang ang nihimo niini sa pagkandado.

Matud ni Eduave nga ang mga anak niini pulos na minyo ug anaa na sa lungsod sa Tagoloan, Misamis Oriental, ug nag-inusara lamang sa lugar ug bisitahon lamang kini sa mga anak.

Ang patayng lawas gidala na sa Bollozos funeral parlor ning panahona. Samtang ang kapolisan mohulat pa sa resulta sa otopsiya.