Mga nanulis sa CdeO dili organized group

HUMAN sa sunod-sunod nga pagpanulis nga natigayon dinhi sa siyudad sa Cagayan de Oro gipaabot ni Police Superintendent Gerardo Rosales, Cagayan de Oro City Police director, nga dili organized group ang mga mi-atake niini apan bag-o lamang nga grupo.

Gibutyag niini nga ang mga organisado nga tulisan dili basta-basta manulis nga P80 mil lang ang mabitbit, ug kasagaran sa ilang tumbok mao gyod ang mga bangko nga dako gyod nga kantidad ang madala.

Matud ni Rosales nga ang nahitabong pagpanulis sa usa ka junkshop niadtong Martes usa ka bag-ong grupo nga misulod sa siyudad basi sa mga hitsura niini ug anaa sa ilang mga listahan walay kapareha sa mga hulagway.

Dugang ni Rosales nga tulo sa mga suspetsado sa maong pagpanulis mao lamang ang adunay dala nga armas ug giingong sinaw kaayo nga posibleng toy gun o mga peke nga pusil.

Namatikdan niining daghan sa mga tulisan nga maoy gamiton ang toy gun sa pagpanulis aron pagpanghadlok lamang.

Hinuon gipasabot niini nga gihimo na nila ang pagukod sa suspek nga gikatahong nakabasi karon sa probinsya sa Bukidnon.

Gipabantayan ug gipaalerto usab niini ang mga establismento aron dili mabiktima sa mga dautan.

Kahinumduman nga na-ukay ang katawhan sayo sa kabuntagon dihang gitulis ang Devibar Junkshop sa Brgy. Nazareth ug nabitbit ang P80 mil nga kantidad.