Gipatay sa kapuyo?

NAILHAN na ang babaye nga gi-salvaged sa sementeryo sa lungsod sa Kinoguitan, Misamis Oriental.

Giila ang biktima nga mao si Generosa Pabella, 38, nagpuyo sa apartment nga nahimutang sa Julio Pacana-Licoan St., ning siyudad sa Cagayan de Oro ug trabahante sa Puyat Steel.

Kauban niini sa apartment ang kapuyo sa biktima nga mao si Charles James Balbua, 30, taga Lapasan ning siyudad ug giingong walay trabaho.

Si Senior Police Officer 2 (SPO2) Ulysses Romulo sa Police Station 5 (PS5) sa Macabalan ug maoy niimbestigar sa kaso niingon nga unang na-missing ang biktima niadtong Mayo 27 human ang uyoan niini ang nagpatabang sa buhatan sa PS5.

Uwahing nakita ang biktima sa iyang trabaho niadtong Mayo 26 apan sugod sa Lunes paingon sa Miyerkules wala na kini mitunga sa iyang trabaho nga gikatingala kaayo sa manager labina naanad sila nga kung mo-absent kini mananghid gyod o kaha manawag sa buhatan.

Tungod niini ang paryente sa biktima nangita na niini hinungdan nga mismong si SPO2 Rumolo niimbestigar niini ug gisusi kini sa iyang apartment nga gipuy-an.

Wala nay tao sa mismong apartment gawas lamang sa silingan sa atbang nga bahin.

Hinungdan nga gipangutana niini ang pamilya Lido ug ang anak niini ug niingon nga niadtong Mayo 26 sa gabii ilang nadungog nga nag-away ang maglive-in ug ilang nakita nga 'daw' gituok sa kapuyo si Pabella.

Nagtuo silang nagkauli na ang duha tungod kay wala naman dayon silay nabati nga tingog sugod niadtong adlawa.

Mao na lang usab ang namatikdan nga mogawas ug sulod ang kapuyo apan wala na makita si Pabella.

Tungod niini mas gipailawoman sa kapolisan ang imbestigasyon ug pangitaon ang biktima nga na missing.

Apan dihang nadungog nga adunay gi-salvaged nga babaye sa lungsod sa Kinoguitan gisusi dayon kini sa mga hingtungdan ug nakompiram kining si Pabella. Napuno ug samad nilubaan ang lain laing parte sa lawas sa biktima. Nanglagom usab ang lawas niini agi og bun-og.

"Giputos siya pag-ayo og gidala didto sa Kinoguitan aron ilabay," matud ni Rumulo.

Adunay sakyanan nga gipanag-iya si Pabella ug gisuta pa sa kapolisan ning panahona kong posible ba kaha kining maoy gigamit sa pagdala sa biktima ngadto sa Kinoguitan.

Ang kapuyo maoy usa sa gitumbok nga suspek apan kwestyonable kaayo tungod kay ang kauban ni Pabella sa Puyat Steel miingon nga niadtong Mayo 31, nakaanha sa ilang buhatan si Balbua ug giingong nangutana kung naka-duty ba si Pabella. Rason niini, wala nay uli-uli ang biktima.

Hangtud karong panahon, padayon ang imbestigasyon sa kapolisan labina kung kinsa ang responsable sa pagpatay sa biktima.