Empliyado sa BDO gitulis

DUHA ka mga empliyado sa Banco de Oro ang gitulis mga alas 9:30 sa buntag sa JR Borja St., Cogon, ning siyudad sa Cagayan de Oro.

Sa report sa Police Station 2 (PS2) sa Cogon, nagbutyag nga ang bag nga adunay sulod kwarta paingon unta nga dalahon sa laing branch sa duha ka empliyado ang nadala sa tulisan.

Apan ang teller nga giilang si Anna Ampuan nga maoy nihupot sa bag kuyog ang laing usa ka empliyada ang giatangan sa upat ka mga wala mailang tulisan.

Kalit kining gitionan og pistola ug gikuha ang iyang gidala nga bag dungan sa pagdeklarar og tulis. Wala makalihok ang biktima sa kahadlok nga gibati ug napugos sa paghatag sa iyang dala nga bag nga adunay sulod wala pa matino nga kantidad.

Si Nimfa Rosales, kinsa BDO branch manager, dili pa makahatag og pamahayag labina gyod ang kantidad nga nakuha gikan sa iyang mga sakop padayon pa ang ilang pagsuta niini.

Gibati usab og sobrang kahadlok ang biktima tungod kay wala gidahom nga mahitabo ang insidente.

Padayon pa usab ang imbestigasyon sa kapolisan aron pagsunod sa mga suspetsado nga daling misibat sakay sa giingong motorsiklo.

Kahinumduman gitulis niaging tuig ang maong bangko. Daghan usab ang nakapangutana kung nganong mga babaye ang gisaligan nga ipadala og kwarta nga wala pay nakabantay niini.