Gold bars nasakmit

MGA P72 milyones nga pekeng gold bars ang nasakmit atol sa entrapment operation nga gihimo sa Villanueva Police Station niadtong Domingo mga alas 4 sa hapon sa atubangan sa Our Lady of Guadalupe Church sa lungsod sa Villanueva, Misamis Oriental.

Nasikop sa operasyon si Leonilo Roa Fabre, 32, minyo, taga Alubijid, Misamis Oriental.

Si Police Chief Inspector Surki A. Serenas, hepe sa Villanueva Police Station nga nahinabi sa Sun.Star SuperBalita, niingon nga mailad unta ang gold buyer nga gikan pa sa Sucat, Paranaque, didto sa kaulohan nga mao si Gigi F. Cadayday, 43, kinsa nahidangat lang denhi sa siyudad alang sa binayranay.

Maayo na lamang adunay naka-inform sa kapolisan nga giingong modus niining suspek ang pagpangilad sa kliyente hinungdan nga gihimo dayon ang operasyon.

Matud ni Serenes nga siya mismo uban sa iyang team nga naka sibiliyan niadtong tungora ang nakabantay ug nakakita sa binayranay atubangan sa simbahan hinungdan nga ilang deretsong gisita ug gisikop. Nasutang ang duha ka mga gold bars pulos peke apan sa unang pagtan-aw niini makailad gyod kini.

"Ang buyer nagduda sab siya nga peke kay mahal bisan og P72 million ang kantidad mosugot raman nga unhan lang siya og P500,000," matud ni Serenas.

Kung dili pa kini peke, dili gyod mosugot kining mamaligyaay nga unhan lang siya sa kagamay sa maong kantidad ug wala pay mga kasulatan.

Matud ni Serenas nga gawas niini, natudlo usab si Fabre nga suspek sa pagpanulis nga natigayon niadtong Sabado sa maong dapit ug daw ikaduha na niini nahimo ang pagpangilad.

Nagtingkagol karon sa prisuhan ang suspek kinsa gikatakdang pasakaan og kasong swindling.

Dugang ni Serenas nga daghan na ang mga kaso sa pagpangilad og gold sa area ug pipila gihapon sa mga buyer ang mailad. Tambag niini nga sutaon una sa buyer kung asa nagikan ang mamaligyaay ug tan-awon una ang items.

Anaa sa kostudya sa kapolisan ang duha ka mga peke nga gold bars nga daw mobalor og P72 milyones.