Pintor nakaplagang patay

PATAY na nga nakaplagan sulod usa ka lawak sa Macanhan Elementary School ang usa ka lalaki kagahapon mga alas 5 sa kadlawon sa Macanhan, ning siyudad sa Cagayan de Oro.

Si Senior Police Officer 3 Fernando Laspoña sa Police Station 4 (PS4) sa Carmen niila sa biktima nga mao si Joel Golajavier, hingkod ang edad, lumad nga taga Oroquita City ug kasamtangan nga nagtrabaho isip stay-in nga pintor sa gi-renovate nga tunghaan sa dapit.

Matud ni Laspoña sa pakighinabi sa Sun.Star SuperBalita nga ang kauban niini sa trabaho nga mao si Celso Labares niingon nga kauban pa niya sa panihapon ang biktima gani magsige pa sila og pangatawa niadtong gabhiona.

Ug kagahapon dihang iya na unta kining pukawon nakurat siya nga wala na kini kinabuhi hinungdan nga nangayo og police assistance.

Sa pagresponde sa kapolisan sa PS4 ug Scene of Crimes Operatives (Soco), walay nakitang foul play sa kamatayon niini tungod kay walay bisan usa nga samad man lang niini gawas lamang sa pagahi sa lawas na niini.

Dako ang pagtuo sa kapolisan ug bisan mga kauban niini nga gi-urom ang biktima nga maoy hinungdan sa kamatayon apan ang Soco mitambag lang gihapon nga aron mas sigurado itopsiya ang patayng lawas niini.

Gidala na karon ang biktima sa Bollozos funeral parlor samtang pamilya niini gikatkadang mahidangat pa sa siyudad.

Tambag ni Laspoñas nga usa sa hinungdan sa urom mao ang sobrang kabusog sa gipangkaon nga deretso lang dayon ikatulog. Dugang niini nga kinahanglan usa nga magpasingot. (SVB)