'Tomboy', kapuyo gipatay

NAKABSAN sa kinabuhi ang tomboy ug kapuyo niini dihang gipusil sa tulo ka wala mailang suspetsado niadtong nilabayng adlaw mga alas 8:30 sa gabii sa Barangay 17, siyudad sa Gingoog, Misamis Oriental.

Giila ang biktima nga mao sila si Dolorita Fernandez, 51, ug kapuyo niining si Maria Theresa Co, 39, residente sa susamang dapit.

Si SPO2 Rommel Abellana kinsa maoy imbestigador sa kaso sa Gingoog Police Station nga nahinabi sa Sun.Star SuperBalita niingon nga pauli na ang mga biktiman niadtong gabhiona gikan sa ilang bugasan sa merkado sa Gingoog dihang gi-atngan sa tulo ka wala mailang suspetsado.

Deretsong gipamusil ang mga biktima hinungdan sa pagkaigo sa lain-laing parte sa ilang lawas.

Samtang nagbuy-od nga nagkadugo ang mga biktima dali dayon nga misibat ang mga suspetsado sakay og motorsiklo.

Daling girespondehan sa kapolisan ang insidente ug tungod kay duna pay ginhawa ang mga biktima gisuwayan og dala sa balay tambalanan apan dead on arrival nga gideklarar sa mga doctor si Co, samtang si Fernandez giduso sa ospital ning siyudad sa Cagayan de Oro.

“Wala na siya niabot sa Cagayan ug diha sa dalan sa Balingasag nakabsan sa kinabuhi kining biktima,” matud ni Abellana.

Nahipos gikan sa crime scene ang pipila ka mga basyo sa bala sa kalibre .45.

Sa kasamtangan gisuta pa sa kapolisan ang motibo sa pagpatay sa duha ug gisalikway ang giingong robbery tungod kay walay bisan usa sa kwarta o mga gamit nga nawala gikan niini.

Bukas usab sila sa posibilidad nga love triangle ang hinungdan sa pagpatay sa duha ka mga biktima.