Nag-bike nalagpot, nalatayan pa gyud

UBOS pa sa obserbasyon sa mga doktor ang usa ka lalaki human unang nabangga sa sakyanan ug dihang milagpot nalatayan pa sa laing sakyanan niadtong Huwebes mga alas 9:15 sa buntag sa Gusa Higway ning siyudad sa Cagayan de Oro.

Giila ang biktima nga mao si Roger Bagas, 31, taga Zone-1 Patag ning siyudad.

Nasayran nga gikan pa ang biktima niadtong tungora sa puloy-anan niini sa Patag ug nisakay kini sa iyang bisiklita paingon sa trabaho sa slaughter house sa Barangay Cugman.

Apan usa ka L300 van nagdala og plaka nga KDU-148 diin ang driver niini kalit lang miabri sa pultahan hinungdan sa pagkabangga sa gisakyang bisiklita.

Tungod kay kusog sab ang pagkabangga milagpot ang biktima taliwala sa dalan nga miresulta dayon sa pagkalatayan sa biktima sa laing L300 van nga nagdala og plaka usab nga KGF 134.

Usa sa L300 van ang mibiya human sa insidente apan usa niini maoy nidala og dali sa biktima sa Northern Mindanao Medical Center.

Ubos pa sa obserbasyon sa mga doktor ang biktima ning panahona sulod sa emergency room human nakaangkon og bun-og og samad sa nagkadaiyang parte sa lawas. (SVB)