Tinun-an gisudlan ug dautang espiritu?

NANGLAGOM ug magsige og siyagit ang duha ka mga tinun-an sa Lumbia National High School human gituohang nasudlan og dautang espiritu gikan pa niadtong Huwebes sa gabii hangtod kagahapon sa buntag sa ilang puloy-anan sa Barangay Lumbia ning siyudad sa Cagayan de Oro.

Ang mga biktima mao ang magsuon nga sila si Manilyn ug Jessa, (bansagon gipugngan) pulos tinun-an sa high school.

Ang inahan sa biktima nibutyag nga kalit lang ang iyang mga anak mosiyagit susama sa giihaw nga baboy, kusgan kaayo kung tabangon ug nanglagom na ang ilang mga lawas sa sige og kabunal tungod sa sige og limbag-limbag.

Giingong adunay makit-an ang mga biktima nga tulo ka mga dagkong lalaki nga itum og hitsura nga giingong motawag sa ilang mga pangalan.

Giingong aduna usab kalit nga modala sa lawas sa biktima nga mura kini og duyanon nga hinungdan sa kalisang sa mga biktima.

Niadtong Huwebes sa gabii gi-ampoan kini sa pari ug nag arang-arang nga nahimong normal ilang paminaw apan kagahapon sa buntag mikalit na usab pagbalik ang ilang gibati.

Dili na mapugngan sa iyang inahan nga si Marilyn ang kusog sa iyang duha ka mga anak hinungdan nga nangayo na kini og tabang. Ubay-ubay usab sa katawhan ang misuway sa pagtabang sa mga biktima.

Sa pagsulat ning balita gikatakdang dalhon sa Divine Mercy Shrine ang duha ka mga biktima aron makabati og kalinaw diin naghulat usab ang tulo ka mga pari sa dapit.

Gawas sa magsuon giingong laing tinun-an usab ang dunay susama nga gibati nga gituohang gisundlan og dautang espiritu. (Stephanie V. Berganio)