Giihaw sa bana

GITUOK ug gilubong likod sa ilang balay sa bana ang iyang kaugalingon nga asawa niadtong nilabayng mga adlaw sa Barangay Udiongan, siyudad sa Gingoog, Misamis Oriental.

Gibutyag ni Police Senior Inspector Odelon Oclarit, hepe sa Gingoog Police Station sa interbyu sa usa ka sibyaan sa radio, nga giingong wala gibasulan ni William Anyuan, 41, ang pagpatay sa iyang asawa nga mao si Liezl Anyuan human niini nadungog nga aduna kini gikabuangan nga laing lalaki.

Usa ka negosyanti sa dapit ang giingong karelasyon sa biktima nga maoy hinungdan sa kalagot ug sobrang selos sa bana.

Giingong taod-taod na usab nadungog sa bana gikan sa mga silingan ang maong relasyon, gani una wala lang kini gitagad. Apan niadtong tungora nadungog niya mismo nga nagkasabot ang duha nga magkita sa dapit nga walay nakaila kanila.

Posibleng kaulaw, ug dakong gugma sa iyang asawa hinungdan nga nahimo sa suspek ang krimen.

Unang gituok niini ang asawa ug gisundan dayon sa pagluba makapila ka higayon nga maoy hinungdan sa hinanaling kamatayon sa biktima.

Dihang namatay na ang biktima gilubong dayon kini sa bana sa likod sa ilang puloy-anan.

Apan giingong namatikdan kini sa mga silingan. Nadiskubre ang patayng lawas nga gilubong niadtong adlawng Biyernes.

Boluntaryo usab nga mitahan si William ug niingon nga wala niya gibasulan ang pagpatay sa kaugalingon nga asawa ug andam niining serbiyuhan ang silot nga ipahamtang kaniya.

Kasong parricide ang gikatakdang ipasaka batok sa suspek ug gilantaw sa mga hingutngdan sa biktima nga hatagan og saktong lubong ang biktima.