Internet cafés gibaharan

GIBAHARAN ang tanang mga Internet cafés nga sirad-an kung dili motuman sa nakalatid sa ordinansa sa siyudad sa Cagayan de Oro.

Si Konsehal Adrian Barba, chairman komite sa education sa konseho, nibutyag nga niadtong niaging mga semana nakigkita siya sa mga nanag-iya og Internet café sa siyudad ug gi-required sila sa pagkuha og kopya sa ordinansa aron makabalo unsay gidili diha sa pagpadagan sa ilang negosyo.

Usa sa mga butang nga nakalatid sa ordinansa mao ang pagdili sa mga tinun-an sa elementarya ug high school sa pagsulod sa Internetan sa oras sa klase.

Makasulod lamang ang tinun-an kung kini importante kaayo labina adunay i-research apan kung aduna lamang note gikan mismo sa principal o maestra.

Giingong kinahanglan nga balibaran sa mga nagdumala og Internet café ang mga tinun-an nga naka-uniporme o bisan wala naka uniporme nga mosulod niini bisan pa sa pasangil nga walay klase.

Makadula lamang ug makagamit sa Internet ang kabataan panahon sa Biyernes sa gabii o Sabado.

Kahinumduman pipila ka mga tinun-an sa high school ang nabagsak tungod sa walay pagsulod sa klase ug sa Internet café lamang mag-estambay.

Matud ni Barba nga kung kinsa nga mga Internet café, layo o duol man sa mga tunghaan, ang makasupak sa ordinansa ang hatagan og rekomendasyon nga isirado na lamang.

Tambag usab ni Barba sa mga ginikanan nga dili lamang isalig ang ilang mga anak sa magtutudlo panahon sa tingklase labina sa mga publikong tunghaan tungod sa kadaghan sa mga studyante nga atimanon sa mga magtutudlo.

Kinahanglan usab i-monitor ang mga anak kung nisulod ba kini sa ilang klase. (SVB/NJM)