Jail guard gipriso kay naghubo

GIPRISO ang usa ka jail guard human naghubo gumikan sa grabeng kahubog kagahapon sa kadlawon sa Agora ning siyudad sa Cagayan de Oro.

Ang jail guard sa Misamis Oriental Provincial Jail (MOPJ) nga si Sam (bansagon gipugngan) walo ka tuig na nga nagsilbi sa MOPJ ang gibalhog sa prisuhan human giingong naghubo sa iyang mga sapot diha sa usa ka videoke bar sa Agora.

Gibutyag sa kapolisan sa Police Station 3 (PS3) sa Agora nga ilang gikostudya si Sam tungod kay mireklamo ang katawhan nga nakakita niini nga eskandaloso kaayo ang gihimo niining paghubo sa tanang sapot gawas pa nga nagbitbit kini og kalibre 45.

Tungod niini, gi-safekeeping si Sam sa prisuhan sa PS3. Hinuon wala usab kini nanghasi o nanghagit og away apan gumikan sa kahubog kalit lang kining naghubo sa iyang sapot hinungdan nga daghan ang nakakita sa pribadong parte sa lawas niini.

Si Jail Warden Dominador Tagarda Jr. nibutyag nga iyang ihatag sa PS3 kung unsay isilot sa iyang sakop labina nga off-duty ni Sam niadtong tungora.

Nagtuo si Tagarda nga adunay problema ang iyang sakop tungod kay karon pa niya nahibaw-an nga nahubog kini. Gani nakadayeg siya niini tungod kay maayo nga trabahante sulod sa walo ka tuig gawas pa nga dili gyod ma-late sa iyang trabaho.

Matud ni Tagarda nga kung unsay desisyon sa mga polis kung pasakaan ba kini og kaso anaa na kanila ang desisyon.

Apan gibutyag ni Tagarda nga wala siya nagkulang sa pahimangno sa iyang mga sakop labina iyang kinaiya ang dili moinom.