Buntis naghikog, patay

NAKABSAN sa kinabuhi ang 16 anyos nga dalagita human ni-inom og hilo niadtong Lunes sulod sa puloy-anan niini sa Sitio Bugwak, Barangay Sta. Cruz, lungsod sa Tagoloan, Misamis Oriental.

Giila ang biktima nga mao si Melissa Cuniado, residente sa susamang dapit ug bag-o lang nga migradwar sa high school niadtong bulan sa Marso.

Sa report sa Tagoloan Police Station, nasayran nga nasapon ang biktima nga nagbula na ang baba sulod mismo sa lawak niini niadtong tungora ug tupad sa biktima ang botelya sa malathione nga gituohang maoy giinom.

Gisuwayan og dala sa pamilya ang biktima sa Polymedic Medical Plaza sa maong lungsod apan dead on arrival kining gideklarar sa mga doktor. Nasuta usab didto sa balay tambalanan nga duha ka bulan na kining mabdos.

Ang igsuon niini maoy nakahibalo sa sekreto ni Melissa apan gitago lamang tungod sa kahadlok sa biktima sa iyang mga ginikanan.

Giingong nagtrabaho si Melissa sa usa ka tindahan sa Barangay Poblacion ug giingong didto naila niini ang usa ka lalaki nga ginganlan og Warren.

Nagkauyab ang duha nga maoy gituohang hinungdan sa pamilya nga nakaburos ninii apan posibleng wala gitubag sa lalaki ang nahimo.

Sagol nga problema, kahadlok sa pamilya maoy gituohang hinungdan nga naghikog na lamang ang biktima. Girespondehan sa kapolisan ang hitabo ug walay nakita nga foul play ang kapolisan.

Tambag sa kapolisan sa mga batan-on nga unta dili magpadala sa mga matam-is nga pulong sa kalalakin-an labina bata pa kaayo.

Gipahaluna pa sa pamilya ang patay’ng lawas sa 16 anyos usa mohatag og pamahayag kalabot sa nahitabo sa anak ug unsay aksyon nga himoun ngadto sa nakabuntis sa ilang anak kinsa giingong nagtago-tago na ning panahona.