P200 mil nabitbit sa tulisan

LAING establisimento na usab ang gitulis ning dakbayan sa Cagayan de Oro niadtong Lunes.

Mga ala 1:00 sa hapon gitulis ang Happy Ware House Marketing Corp. nga nahimutang sa dalan Yacapin-Velez St., ning siyudad sa Cagayan de Oro.

Halos malisang ang mga empliyado sa kalit nga pagsulod sa duha ka mga tulisan nga nagdala og 38 kalibre ug usa ka granada ug mideklarar og tulis.

Walay nahimo ang mga tindera kondili ihatag ang kita niadtong tungora nga mobalor og kapin P200 mil ug prepaid load nga mobalor usab og P200 mil. Ang maong establismento kumpleto sa prapaid card, prepaid load ug uban pa.

Duha ka mga lalaki ang mitulis samtang usa kanila anaa sa gawas sa establismento nga maoy nagsilbing look-out. Nagsul-ob lamang og short pants ug t-shirt ang mga suspek ug human nakuha ang tinguha, yano lamang kaayong migawas ug nagsakay sa naghulat nga motorsiklo.

Matud sa mga empliyado nga maglisod sila sa pagsukol tungod kay adunay mga armas gawas pa nga hadlok kaayo tan-awon ang gibitbit sa tulisan nga granada.

Si Police Superintendent Danildo Tumanda, hepe sa Police Station 1 (PS1) sa Divisoria, niingon nga kasamtangan pa nilang gisunod ang kaso labina ang padayon nga pagukod sa suspek.

Aduna na silay lead labina mihatag og deskripsyon sa mga tulisan ang mga trabahante.

Giingon niini nga posibleng organized group ang mitulis apan dili sakop sa Alferez group. Gikasubo lamang niini nga daot ang CCTV sa maong establismento.

Bukas usab sila sa posibilidad nga inside job labina nga paspas ug wala ray 15 minutos nakuha sa tulisan ang tinguha.

Gipaalarma na usab ni Tumanda ang kasikbit nga mga police station aron sa pag-atang sa suspek.

Kahinumduman niaging semana sunod sunod nga kaso sa pagpanulis ang misiaw sa siyudad diin biktima empliyado sa Banco de Oro, ug gisundan pa sa pagpanulis sa LBC sa Gusa.