Konsehales: Patubagon ang hepe sa serye sa tulis

TUNGOD sa sunod-sunod nga kaso sa pagpanulis ning siyudad, gibutyag sa opposition councilors sa siyudad nga angayan na nga mo-resign sa iyang pangatungdanan si Cagayan de Oro City Police Director Gerardo Rosales.

Unang nipagawas sa iyang pamahayag si konsehal Roger Abaday atol sa sesyon niadtong Martes.

Gibutyag niini nga “very alarming” na ang kaso sa pagpanulis ug nagkagrabeng krimen sa siyudad ug naninguha kini nga unta ang kapolisan ning siyudad mag-alerto ug aktibo sa ilang pagserbisyo.

Apan dili mabasol ni Konsehal Ramon Tabor si Abaday sa punto niini tungod kay ang teorya layo kaayo sa posibilidad sa reyalidad.

Gipasabot niini nga bisan taliwala sa kakulangon sa kabtangan ug kakulangon sa tawo, daghan sa mga polis ang nihimo sa ilang parte ug naningkamot nga mahapsay ang siyudad.

Gibutyag niini nga ang kasamtangang mga krimen ra maoy gibantayan ug dili na dayon madayeg ang mga nakab-ot o mga kalampusan sa kapulisan.

Dugang niini nga dili lang ang polis ang angayan nga basulon kung adunay mga krimen, ang mga katawhan usab dapat responsable aron dili sila mabiktima sa pagpanulis. Maglikay na lamang sila sa pagamit og pagdala sa mga mahalon nga butang sa mga publikong lugar.

Kinahanglan usab nga mosunod ang mga establismento sa hangyo nga magbutang og klaro ug dili depektibo nga mga CCTV camera ingon man ang security guard agi og tabang nga dili mabiktima sa pagpanulis.

Bisan pa sa pamahayag ni Tabor, gibutyag ni Konsehal Edgar Cabanlas nga angayan na gyud mo-resign si Rosales tungod sa giingon niining pagka “breakdown” sa peace and order sa siyudad.

Dugang niini nga kinahanglan usab i-account ang intelligence funds ug kinahanglan usab nga ibalik ang theft and robbery section tungod kay wala nay grupo nga magtutok sa kaso sa pagpanulis sa siyudad.

Kinahanglan usab nga padayon ang emergency response susama sa 911 nga moaksyon sa tawag emerhensya.

Apan si Konsehal Ian Mark Nacaya, kinsa chairman sa Police, Fire and Public Safety sa konseho, nisugyot nga dili lang deretso ipa-resign si Rosales kon dili ipatawag ang atensyon niini sa konseho ug ipa-explain sa mga nahitabong krimen nganong wala pa masulbad.

Gani gitataw ni Nacaya nga basi sa statistics sa krimen ning tuig 2012 miubos ang kaso sa krimen kon itandi niadtong nilabayng tuig. Tanan usab gitinguha nga moalerto ang polis apan tungod sa kagamay lamang sa kapolisan dili na maapod apod pagserbisyo ang tibouk siyudad.

Tungod niini, gibakwi ra usab ni Cabanlas ang sugyot niining ipa-resign kon dili angayan patubagon si Rosales niini.

Dugang pa ni Abaday nga apilon usab ang regional director sa Police Regional Office–Northern Mindanao sa Camp Algar tungod sa nadungog nga bangi sulod mismo sa rehiyon nga usa sa hinungdan nga nakabalda sa kahapsay ug kalinaw.

Kahinumduman nga sunod-sunod nga kaso sa pagpanulis ang natala dinhi sa siyudad diin una mao ang mga empliyado sa Banco de Oro, gisundan dayon sa LBC Branch sa Gusa ug labing uwahi sa Happy Warehouse Marketing Inc. diin liboan ang nadala sa tulisan. (NJM)