Lalaki gipusil, patay

PADAYON pa nga giimbestigahan sa kapolisan ang pagpangluthang nga mikalas og usa ka kinabuhi kagahapon mga alas 4:15 sa kaadlawon sa Tiano-Del Pilar, ning siyudad sa Cagayan de Oro.

Si Police Officer 1 April Rose Alta usa ka Police Trainee sa Police Station 1 (PS1) sa Divisoria niingon sa Sun.Star SuperBalita nga hangtod ning panahona, wala pa gihapon maila ang biktima.

Girespondehan sa mga imbestigador ang hitabo human nakadawat og tawag ug maoy naabtan sa kapolisan ang nagbuy-od nga biktima nga naligo sa iyang kaugalingon nga dugo.

Dili na mailhan ang sinina niini tungod sa kapuno sa dugo gawas lamang sa pantalon ug sandal niini. Walay nakaila sa biktima dihang gilibotan kini sa mga ususero.

Blanko usab ang kapolisan kung kinsa ang responsable sa krimen.

Gani, gisuwayan pa kini og dala sa JR Borja Memorial Hospital apan dead on arrival na nga gideklarar sa doktor. Wala pa matino nga armas ang gigamit sa pagpangluthang.

Apan usa ka witness ang niingon sa iyang bersyon nga unang adunay gikaaway ang biktima niadtong tungora, nagkalalis apan dili lang madungog unsay giawayan sa duha. Mao na lamang dayon ang nadungog nga kusog nga buto.

Matud sa nakasaksi nga wala kaayo niya gitagad tungod kay ila man katong problema apan dihang milakaw ang suspek, maoy iyang nakita nga nagkadugo na ang biktima.

Ang patay’ng lawas gidala na sa Bollozos funeral parlor kinsa hangtod ning panahona wala pay ni-claim sa patayng lawas niini.