Nailad sa baratong iPhone

CAGAYAN DE ORO - Dili tiaw ang kasinatian sa inahan ug anak nga giilad sa usa ka lalaki niadtong Biyernes sa Limketkai Gateway, Lapasan ning siyudad sa Cagayan de Oro.

Si Juliet ug anak niining si Julie Ann, (apelyido gitago sa hangyo sa mga biktima) taga Osmena Extension ning siyudad nga nainterbyu sa Sun.Star SuperBalita niingon nga sa kadugay na nilang residente sa siyudad wala sila magdahom nga mailad.

Igo na lamang nga nagpatabang sa Police Station 2 (PS2) sa Cogon ang mga biktima.

Matud sa inahan nga si Juliet nga gikan nigawas sa iyang klase sa duol nga unibersidad si Julie Ann niadtong tungora ug makigkita kaniya sa Limketkai tungod kay adunay project nga paliton.

Apan usa ka lalaki ang miduol niini ug ni-offer kaniya og iPhone (Apple brand) sa kantidad lamang nga P3 mil. Tuod man gipahuptan pa sa lalaki ang iPhone ug naagni kaayo si Julie Ann nga paliton kini.

Tungod kay wala may dala nga maong kantidad ang biktima, nananghid pa kini sa lalaki nga mouli usa apan nipasalig nga mobalik ra ug dili gyod i-deal sa uban kay paliton ra kini kung makabalik.

Ang inahan paingon na sa Limketkai niadtong tungora ug natingala nga wala iyang anak nga kasabot.

"Niabot nako sa Limketkai ug natingala ko kay wala na si Julie Ann, niuli diay kay nagkuha og kwarta..pagbalik sa akong anak, nalipay gyod kaayo ang lalaki nga mibalik nga anaay dala nga kwarta," saysay sa inahan nga si Juliet.

Gibutyag sa lalaki nga sa second floor lang himoun ang binayranay aron plastar ug dili kaayo dayag hinungdan nga misunod usab ang inahan ug anak.

"Pirmero gikulbaan ko kay bag-o paman gud naila sa akong anak ang lalaki pero pagkakita nako sa cellphone naagni gyod sad ko sa iyang hitsura."

Gihuptan na ni Julie Ann ang iPhone ug gigamit-gamit ug nahuman na usab pog hatag niini ang kantidad nga P3 mil, gani gusto pa mohangyo si Julie ann og P2,500 apan dili mosugot ang lalaki.

Gisulod dayon ni Anne sa pouch niini ang iPhone apan niingon ang lalaki nga tudloan siya unsaon paggamit niini ug pipila ka minuto, gihatag kaniya ang pouch ug niingon pa nga dili usa abrihan labina gihugot pag-ayo niini ang hikot.

Kauban sa inahan, mideretso sila sa cellphone accessories aron unta palitan og cover ang iPhone apan pag-abri ni Julie Ann sa pouch nakurat pag-ayo sa nadiskubre nga usa diay ka sabon ang sulod sa pouch ug ilad ang gihimo kanila sa lalaki.

Gituohan nga duha ka pouch ang dala ug giilisan lang ang gipahuptan-huptan niini nga iPhone.

"Ang ako lang nga basin daghan pa ang ilang biktimahon. Ug para ma-aware pud ang ubang studyante ug bisan kinsa nga tawo akong giawhag nga dili gyod magsalig sa bisan kinsa," matud ni Juliet.

Kagahapon, giimbistigahan ang mag-inahan nga susihon sa photo gallery sa PS2 ang mga biktima kay si Julie Ann niingon nga maila kaayo niya kini kung makita og usab.

Nasayran nga sa maong dapit aduna gihapon tinun-an ang nabiktima human ang iyang cellphone giilisan gihapon og kahoy.

Ang kapolisan nihimo na og imbestigasyon kalabot sa hitabo.