Gipusil sulod sa balay, patay

MOKABAT walo ka mga samad pinusilan ang naangkon sa usa ka lalaki nga gipusil niadtong Domingo mga alas 9:30 sa gabii sa Sta. Cruz, lungsod sa Tagoloan, Misamis Oriental.

Giila ang biktima nga mao si Rolly G. Cabalona, 34, ulitawo, residente sa susamang dapit.

Ang mga imbestigador sa Tagoloan Police Station niingon nga tulo ka mga suspetsado ang nanuktok sa panimalay sa biktima ug sa pag-abri niini adunay panaglalis nga nahitabo.

Daw deretsong gipusil ang biktima apan ang biktima misuway pa og ambak sa ilang bintana apan giayo kini og pusil sa mga suspetsado, hinungdan nga gawas sa bintana nagbuy-od ang patay’ng lawas sa biktima.

Ang mga silingan dili makaduol atol sa hitabo sa kahadlok nga pusilon.

Girespondehan sa kapolisan ang insidente ug dead on the spot ang biktima.

Basyo sa wala matinong armas ang nakuha gikan sa crime scene.

Gipaubos pa usab sa masusing imbestigasyon ang motibo sa pagpangluthang labina mga kalambigitan sa biktima nganong gipusil patay kini. (SVB)