Hepe sa PRO-Northern Mindanao bag-o na

KAGAHAPON gihimo sa Philippine National Police sa Police Regional Office (PRO) sa Northern Mindanao ang turnover of command sa Camp Alagar, Lapasan ning siyudad sa Cagayan de Oro.

Si Police Chief Superintendent Jufel C. Adriatico samtang naghulat sa iyang promotion sa dili pa moretiro ang gihulipan na ni Police Chief Superintendent Gil Jamila Hitosis.

Sa iyang pamahayag, si Hitosis nibutyag nga unta sa iyang pagsulod isip Regional Director sa PNP-Northern Mindanao suportahan ang iyang mga programa ug mga ipatuman aron mahapsay ang tibuok rehiyon sa iyang administrasyon.

Gibutyag usab niini nga kung adunay mga wala pagka-uyonan sulod sa PNP, kinahanglan adunay mahitabong diyalogo aron maayo ang komunikasyon.

Gipasabot niini nga ang sakto nga pakig-komunikasyon sa kauban sa buhat, sa katawhan maoy makaayo ug makapalambo sa pagpadagan sa tibuok rehiyon.

Si Hitosis usa ka miyembro sa Philippine Military Academy (PMA) Dimalupig Class ‘81 kinsa deputy director sa Directorate for Police Community Relations sa Camp Crame.

Tungod kay adunay importanteng lakaw, wala makatunga sa turnover of command si PNP Chief Nicanor Bartolome kinsa usa gilauman ang presensya niini.

Wala pay usa ka tuig sa iyang pwesto si Adriatico apan gihulipan na kini ug daghan ang nagtuong tungod sa mga kontrobersya nga gikalambigitan niini.

Apan giklaro sa tigpamaba sa PNP-Northern Mindanao nga mao si Police Superintendent Ronnie Cariaga nga ang kalit nga paghulip ni Adriatico walay kalabutan sa mga kontrobersya nga gibato kaniya niadtong nilabay’ng mga semana.

Kagahapon sa iyang pamahayag, nagpasalamat gihapon kini sa iyang mga sakop sa PNP nga misuporta kaniya, mga politiko ug uban pa nga sa iyang pipila ka bulan nga pagdumala sa PNP-Northern Mindanao nga iyang nakab-ot ang iyang mga plano alang sa kalinaw sa rehiyon.