Dalagita gitulis, giposposan

NILANDING sa balay tambalanan ang usa ka dalagita human gitulis ug giposposan pa ang likod sa wala mailang suspetsado niadtong Lunes mga alas 11:30 sa gabii sa dalan Corrales St., ning siyudad sa Cagayan de Oro.

Giila ang biktima nga mao si Geraldine Mantigue, 16, taga Corrales Extension ning siyudad.

Saysay sa biktima nga misakay siya sa motorela niadtong tungora paingon na unta mouli gikan sa balay sa iyang higala aron magtuon.

Apan wala niini gidahom ang iyang kaatbang nga lalaki sa rela usa diay ka tulisan ug kalit lang niingon og tulis. Nakuha iyang cellphone ug dihang mosyagit na unta ang biktima, giposposan og kahoy iyang likod hinungdan sa pagkasamad niini.

Gani ang driver naghunong aron unta gukdon ang suspek apan iyang gitambagan nga dili na lamang ug nihangyo nga dalahon siya sa balay tambalanan.

Gibutyag usab sa driver nga nagpara kaniya ang lalaki ug magpahatod unta sa Agora.

Daling gidala ang biktima sa Northern Mindanao Medical Center (NMMC), kinsa ubos pa sa obserbasyon sa mga doktor ning panahona human nabun-og ang likod. Nabiyaan pa gawas sa rela ang taas nga kahoy nga gibunal kaniya.

Gihulagway sa biktima nga nagsul-ob og pantalon ang suspek ug nagkalo og kolor pula niadtong tungora.

Gibutyag usab niini nga panahon makita kini pag-usab mailhan gyod ang suspek. (SVB)