Lolo gituohang nalumos

NAKABSAN sa iyang kinabuhi ang usa ka lolo human unang gituohang nalumos kagahapon mga alas 6 sa buntag sa daplin sa suba sa Sea Wall, Vila Ernesto, Gusa, ning siyudad sa Cagayan de Oro.

Giila ang biktima nga mao si William Layunon, 64, balo, taga Purok 1A Gusa, ning siyudad.

Girespondehan sa kapolisan sa Police Station 3 (PS3) sa Agora ang biktima dihang nadawat ang taho. Ang biktima unang gituohang nalumos ug dayon giatake sa sakit niini tungod kay nagbula man ang baba.

Ang suod nga higala sa biktima nibutyag nga posibleng gustong maligo lamang niini niadtong tungora apan adunay nakakita nga diriyot kining madigyas human mawad-an og balanse ug nawad-an sa panimuot didto sa suba.

Gitabang ug gialsa aron dalahon sa balay tambalanan apan giingong nagbula ang baba niini ug human niini nakabsan sa iyang kinabuhi.

Tulo ka adlaw na ang nilabay namatikdan nga motipas ang biktima tungod kay gipangguba niini ang iyang balay ug magsige og lakaw-lakaw kay nagpataya man kini og suertres.

Gani apil usab ang mga gamit sa silingan gusto usab nga ipanglabay niini. Giingong gibungaw na kini bisan sa kabata sa pangidaron.

Gisusi ang biktima sa Scene of the Crime Operatives (Soco) ug walay foul play nga nakita sa lawas niini.

Gihikay na usab sa mga silingan ug opisyal sa barangay aron maplastar ug malubong ang biktima.