Moreno mibasura sa igsuon?

GIBASURA ug gitalikdan.

Kini maoy paghulagway ni Dr. Reynaldo Moreno sa giingong gihimo kaniya sa iyang igsuon nga mao si Misamis Oriental Governor Oscar Moreno.

Sa usa ka interbyu niini sa Magnum radio, gibutyag ni Reynaldo nga dili gyod maayo ang iyang relasyon sa igsuon tungod kay taod–taod na siyang gitalikdan niini. Giingong walay suporta nga gihatag ang gobernador kaniya ug sa iyang inahan atol sa eleksyon niadtong 2010.

Iyang gipadayag nga naninguha siyang magserbisyo sa katawhan bisan didto sa ilang lungsod sa Balingasag apan walay pagtugot gikan niini, walay suporta kaniya ug daw magsige lang og saad kaniya sugod pa tuig 2001.

Gibutyag niini nga suportado niya ang iyang mga igsuon sa politika ug iyang gihimo ang iyang parte isip doktor nga makaserbisyo sa mga kabus.

Usa sa gipananglitan niya mao ang paglansad ni Onyok Moreno isip kongresista. Giingon niini nga siya ang gusto magserbisyo sa katawahan pero nag-back out tungod maoy gituboy si Onyok.

"Siya ang nagbuak kanamo... sa among pamilya," matud ni Reynaldo kinsa niangkon nga miduol kang Cagayan de Oro City Mayor Vicente Emano.

Gibutyag niini nga ang iyang pagduol kang Emano aron mangayo lamang og advice ug dili tungod kay magpasilong niini sa umaabot nga eleksyon. Apan kung hatagan siya og higayon ni Emano nga isilong sa ilang partido iya kining dawaton.

"Wala ko nagdahom siya diay ang akong higala sa tunghaan nako didto sa kaulohan sa una ug sa kadugay namo nga estorya naila na nako siya," matud ni Reynaldo.

Giingong nagsaad si Emano nga tawagan siya pero hangtod ning panahona wala pa nagtawag kaniya ang mayor.

Gilimpyohan usab niini ang pangalan sa Mayor.

"Dili si Mayor Emano ang gustong magbuak sa among pamilya, wala gyod intawon siya kalabutan niini apan ang akong igsuon maoy gustong mobuak sa among pamilya," tipik sa pamahayag niini.

Atol sa State of Provncial Address (Sopa), gibutyag sa gobernador nga daw gustong buakon ang ilang pamilya tungod lamang sa politika ug ang iyang pagdeklarar nga sa umaabot 2013 gilauman niini nga anaa na siya sa City Hall.

Mipasalig usab si Moreno nga magmalampuson ug magmauswagon dili lamang ang siyudad sa Cagayan de Oro sa iyang pamuno apan tibuok rehiyon.