Dalaga gilugos, gipatay

GIPUTOS ug sako ang ulo ug gitabonan og karton ang lawas sa usa ka dalaga dihang napalgan nga wala nay kinabuhi sa Barangay 11, siyudad sa Malaybalay, Bukidnon.

Giila ang biktima nga mao si Tessa Buray, 17 anyos, ug residente sa susamang dapit kinsa gituhoang gilugos.

Gitumbok nga suspetsado ang uyoan niini nga giilang si Allan Pepito, hingkod ang edad, ug silingan sa biktima.

Sa imbestigasyon nga gilusad sa Malaybalay Police Office, nasayran nga ang biktima duha na ka adlaw nga wala naka-uli sa ilang puloy-anan ug tungod kay nag-inusara kining anak nga babaye, grabe ang gihimong pagpangita sa mga ginikanan niini.

Apan nadiskubre na lamang ang patay’ng lawas niini sulod mismo sa panimalay ni Pepito. Nakuha usab sa crime scene ang kutsilyo nga gituho-ang gigamit sa pagpamuno.

Nasayran nga giingong unang gi-textmate sa uyoan ang biktima ug dihang nakigkita gihimo niini ang krimen. Atol sa pagkadiskubre, misibat na ang suspetsado ug kasamtangang nagtago-tago.

Sa Malaybalay City Health Office, nasuta nga severe head injury ang gikamatyan sa biktima ug gihulat pa ang resulta kon positibo kini sa pagpanglugos.

"Dili man gani namo patungtungan og lamok, mao na hinuon ang nahitabo?" matud pa sa inahan sa biktima diin hustisya ang gipangayo niini.

Sa pagsulat ning balita, gilusad na sa kapolisan ang man-hunt operation batok kang Pepito ug gipasaka na usab ang kasong Rape with Homicide.