Gi-‘modify’ nga motorsiklo pangdakpon

GIPAHIBALO ni Land Transportation Office (LTO)-Northern Mindanao Director Esteban Baltazar nga ila nang pangdakpon ang mga motorsiklo nga gipang-usab ang porma (modified) dinhi sa tibuok rehiyon.

Gibutyag ni Baltazar nga tungod sa sunod-sunod nga aksidente nga may kalambigitan sa motorsiklo, usa karon sa ilang gihimo ang paglusad og kampanya sa “road safety” ug apil na niini ang pagsita sa mga motorcycle modification.

Gipasabot nga gidili na ang pag-usab sa tinuod nga hitsura sa motorsiklo gikan sa manufacturer, tungod kay nakalatid sa balaod nga dili kini mao ang requirements sa pagpalit og motorsiklo partikular na ang mga parts nga wala na sa balaod.

Gidili usab ang pagtangtang sa mga side mirror, pagtangtang sa tapaludo, ug pagpuli ug tambutso nga labihan kasaba nga maoy kasagaran ireklamo apil na ang mga sirbato nga saba sab kaayo.

Kini unang gipahibalo ni Baltazar aron masayod ang mga nanag-iya og motorsiklo nga gidili na, labi na dinhi sa siyudad sa Cagayan de Oro, ang mga susama niini.