Gipatay atubangan sa asawa

NASAKSIHAN sa asawa ang kamatayon sa iyang bana human gipusil kini sa duha ka mga suspek niadtong Huwebes mga alas 6:45 sa hapon sa Sayre Highway, Musuan Cemetery, Dologon, lungsod sa Maramag, Bukidnon.

Si Senior Inspector Raymon Lumapay niila sa biktima nga mao si Lolito Menisterio, 33, nagtrabaho isip security guard ubos sa FEMJEG Security Agency.

Sa interbyu sa Sun.Star SuperBalita ngadto kang Lumapay, gisaysay niini nga sakay ang biktima ug ang asawa niini nga si Maribeth, 36, ug usa sab ka lalaki nga si Roger John Batal sa gimanehong motorsiko ni Menisterio.

Apan sa naasoy’ng dapit, kalit lang mi-overtake kanila ang laing XRM nga motorsiklo nga walay plaka ug deretsong gipusil si Menisterio.

Tungod niini, nahaybol ang motorsiklo ug nasamdan ang biktima. Nakadagan pa si Menisterio apan gigukod kini sa duha ka mga lalaki nga nagsul-ob niadtong tungora og bonnet, naka jacket ug giayo dayon og pusil ang biktima hinungdan nga na-dead on the spot kini.

Ang insidente nasaksihan mismo sa asawa ug ni Batal, kinsa igo lang gilabyan sa mga suspetsado.

Matud ni Lumapay nga posibleng si Ministerio lamang ang tuyo sa mga suspetsado apan sa pagkakaron, ila pa nga gisuta kon unsay motibo sa pagpatay niini. Dili usab matawag nga carnapping ang motibo tungod kay wala usab nadala ang motorsiklo.

Gipatambalan sa ospital sa Malaybalay ang asawa ug kauban niini kinsa natapsingan lang sa bala sa kalibre .45 nga gigamit diin basyo niini ang mga nakuha sa crime scene.

Sa pagsulat ning balita, anaa pa nagpabilin sa Villanueva Funeral Homes sa Malaybalay ang patay’ng lawas sa biktima.

Gihulat pa usab sa kapolisan ang asawa sa biktima nga mohatag og dugang impormasyon aron makatabang og pagsulbad sa kaso labi na nga shocked pa kini ning panahona.