Asawa naghikog, patay

NAKABSAN gyud sa iyang kinabuhi ang usa ka asawa human milala og hilo niadtong Sabado sa Barangay 04, lungsod sa Talakag, Bukidnon.

Giila ang biktima nga mao si Joesphine Acuman, 33, minyo, residente sa susamang dapit.

Ang inahan sa biktima nga maoy nidali ug dala niini sa Northern Mindanao Medical Center (NMMC) ning siyudad sa Cagayan de Oro niingon nga selos ang hinungdan sa paghikog sa biktima.

Una kining nagkalalis sa iyang bana ug gitumbok nga selos ang hinungdan sa panaglalis. Wala na usab kaayo gidetalye sa inahan niini ang unod sa giawayan apan giklarong nagselos ang biktima.

Gawas pa nga nasubo human daw nakadawat og dili maayo nga pulong ang biktima gikan mismo sa bana niini.

Namatikdan dayon sa inahan nga magsige na kini og hinuktok ug problemado uwahi kalit lang misulod sa lawak niini.

Mga alas 6:00 sa buntag niadtong Sabado, gisusi sa inahan ang biktima sa lawak apan wala nay panimuot ug tupad na sa biktima ang botelya sa hilo sa ilaga nga gitouhang giinom niini. Nagbula na usab ang baba niini.

Daling giduso ang biktima sa NMMC ning siyudad gikan sa Talakag Hospital human giingong kritikal ang kahimtang niini tungod sa giingong daghan kaayo nga hilo ang nainom.

Mga alas 5:56 nakabsan gyod sa iyang kinabuhi ang biktima, kinsa sa pagsulat ning balita gidala na og balik sa ilang puloy-anan sa Talakag.